Զարուհի Փոստանջյան

Նախագահ

«Մենք հավատարիմ ենք մարդկության բարիքների միակ աղբյուրին՝ ազատությանը»:

Հազարամյակներ առաջ մեր նախնիները, ապրելով և արարելով հայկական բարձրավանդակում և նրա հարակից տարածքներում, կազմավորել են հինավուրց հայ ազգը: Այսօր մեզ` ժամանակակից հայերիս, բախտ է վիճակվել ներկայացնել ու փոխանցել հինավուրց հայ ազգի քաղաքակրթությունը  ապագա սերունդներին և մարդկությանը:

Մենք՝ հայերս, հավատում ենք, որ մեր ազգի ծնունդը սկիզբ է առել ազատությունից և համոզված ենք, որ քաղաքակիրթ աշխարհում մենք ունենք հավասար իրավունքներ:

Մենք հավատարիմ ենք «մարդկության բարիքների միակ աղբյուրին»՝ ազատությանը:

Մենք գիտակցում ենք, որ ինչպես հազարամյակներ և դարեր առաջ, այսօր էլ մեր ազատությունները և իրավունքները պահանջում են պաշտպանություն:

Մենք պատերազմի մեջ ենք և վարում ենք սրբազան պատերազմ հանուն մեր Հայրենիքի և Ազգի ազատության:

Մենք ունենք և արտաքին և ներքին թշնամի:

Եթե արտաքին թշնամու հետ հանդիպումը և բախումը տեղի է ունենում սահմանին, ապա հանդիպումը և բախումը ներքին թշնամու հետ տեղի է ունենում ազգային մեծ մարտադաշտում` կառավարություն, նախագահ, խորհրդարան, դատարան, եկեղեցի  և այլն:

Ներքին թշնամին ազգային գորշ միջակություններից կազմված վերնախավն է և նրան սպասարկող ավտորիտար համակարգը, որը ժամանակակից հայ ազգի համար ավելի վտանգավոր է, քան արտաքին թշնամին:

Մենք՝ ժամանակակից հայերս, պարտավոր ենք նվիրել մեզ այն գործի ավարտին, որը մեզանից առաջ սկսել և արժանապատվությամբ առաջ են մղել Հայրենիքի և Ազգի ազատության կամավոր մարտիկները:

Մենք պարտավոր ենք մեր նախնիների` ազատության կամավոր մարտիկների  նման «գրկել  ազատությունը», «ուխտել`  սիրել ազատությունը», կամավոր անցնել «ազատության փշոտ ճանապարհը» և «չնահանջել նեղությունից»:

Մեր Հողի և մեր Ազգի համար մենք շատ ենք զոհաբերել: Այսօր մեր մեծ հարցի լուծումը և մեր բաղձալի ազատություններին  հասնելը շարունակում է մնալ  որպես հիմնահարց: Մենք պետք է պարտավորություն ստանձնենք ավարտին հասցնել մեր ազատատենչ նախնիների սրբազան գործը, ովքեր մեզանից դարեր առաջ և այսօր նվիրաբերել և նվիրաբերում են իրենց կյանքը:

Մենք համոզված ենք, որ մեր Հողի և Ազգի ազատության համար նվիրաբերված անգին կյանքերը և կատարված անգին գործը իր նպատակին է ծառայել: Ազատության կամավոր մարտիկների գործը ունի շարունակություն: Նրանց պատգամները և երկերը ապրում են մեր մեջ, նրանք ունեն հետևորդներ, ովքեր տոգորված լինելով  քաղաքական կամքով,  ունենալով քաղաքական ծրագիր և ազգային հավատամք, ինքահամախմբման,  ինքնակազմակերպման և ինքնաազատագրման միջոցով դառնալու են հայոց հզոր ազգային պետականության  քաղաքացիներ:

Ներբեռնել ինքնակենսագրականը

ԿԻՍՎԵԼ ՆՅՈՒԹՈՎ՝